Temos unha grande noticia que contarvos: Versogramas está desde hoxe dispoñible na plataforma de pago por visionado Vimeo On Demand. Botade un ollo AQUÍ!
Deste xeito, poderedes gozar do documental comodamente desde a vosa casa, en calquera momento, e por un prezo realmente baixiño. Ademais, puxemos a disposición as diversas versións lingüísticas de Versogramas, de modo que tedes cinco posibilidades de reprodución: versión orixinal galega con subtítulos en galego, versión española con subtítulos en español, versión inglesa con subtítulos en inglés, versión reducida en español e versión reducida en inglés.
A plataforma funciona do seguinte xeito: Por 3€, seredes quen de “alugar” o visionado da versión que escollades. Estará dispoñible durante 24h para que poidades ver o documental cantas veces queirades. É posible reproducilo en iOS, Android, Apple TV, Roku e Chromecast.
Un dos obxectivos trala produción de Versogramas foi sempre contribuír ao coñecemento, investigación, goce e difusión da videopoesía. Ademais das proxeccións realizadas en festivais, museos, ciclos e televisión, pensamos que esta é unha boa maneira de achegar ao público de maneira directa o contido do documental e compartir convosco as emocións que a videopoesía esperta.
Agora, a só un click: Versogramas On Demand.
